ILOILO — Nagapanguna ang Western Visayas sa Pilipinas nga naapektohan sang red kag yellow alerts nga gin-issue sang National Grid Corporation of the Philippines (NGCP) sugod sang Abril, 2024.
Sa interview sang Bombo Radyo kay Atty. Janeene Depay-Colingan, Executive Director kag General Manager sang Philippine Rural Electric Cooperatives Association Inc. (PHILRECA), iya ginpahayag nga ila gina-recognize ang epekto sang gulpiyada nga pagtaas sang bill sugod sang Abril tubtob subong nga Mayo.
Suno kay Colingan, nagtaas sang 16.47% ukon masobra P2.00 ang kuryente sa Western Visayas, sa diin, wala sang control ang electric cooperatives nga i-adjust bangud man sa pagtaas sang presyo sa pagbakal sang kuryente halin sa Wholesale Electricity Spot Market (WESM).
Ginpahayag man sini nga bangud man sa mataas nga heat index, nagtaas man ang demand sang supply sang kuryente subong nga Mayo, 2024, sa diin mas mataas kun ikumpira sang nagligad nga tuig sa kapareho nga bulan.
Bangud man diri, nagresulta ini sa pagtaas sang pagkuha sang kuryente sa Wholesale Electricity Spot Market.
Dugang ni Colingan, nga sa sulod sang 30 ka adlaw, naka-issue ang NGCP sang 157 yellow alerts nga buot silingon, kritikal ang supply sang kuryente kontra sa demand, samtang 57 red alerts naman ang na-issue bangud sa kakulangan sa supply sang kuryente.
Bangud man sa pagtaas sang demand sang kuryente, nakitaan nga pila ka mga planta ang nag-shutdown bangud sa abnormal vibrations nga tuga sang tuman ka init nga panahon.
Nahibaluan nga duha ka geothermal plant sa Visayas ang nag-shutdown sugod sang Abril 2024 nga nagtuga naman sang pagnipis sang power reserves.
Napilitan man nga mag-shutdown ang anom ka mga power plants bangud sa mechanical equipment faders, samtang apat naman ka biomass plant ang nag-shutdown bangud sa insufficiency sang save stock sa kapareho nga bulan.
Agud solusyonan ang nangin epekto sini, tuyo sang electric cooperatives sa rehiyon, amo ang pag-apply sang short time loan sa idalum Land Bank of the Philippines agud ma-sustain ang kinahanglanon sa maintenance sang planta.
Pahanugutan naman ang mga konsumidor nga magbayad sang amat-amat sang ila electric bill sa bulan sang Abril kag Mayo.
