Napalpak ang pagpalupad sang North Korea sang rocket nga nagadala sang ila ikaduha nga spy satellite nga natalana kuntani nga mag-abot sa direksyon sang Yellow Sea kag nasidlangan sang Luzon sa Pilipinas.
Suno sa official Korean Central News Agency, ginlunsar ang spy satellite sakay sa bag-o nga rocket sa main northwestern space center. Apang ginpahayag nga naglupok ang rocket sa first-stage flight kasunod sang liftoff bangud sa ginasuspetsahan nga engine problem.
Antes sini, ginpahibalo sang North Korea sa Japan ang plano sini nga magpalupad sang rocket sa direksyon sang Yellow Sea kag nasidlangan sang Luzon sa tunga-tunga sang Mayo 27 kag Hunyo 4.
Ginkumpirma man sang South Korean government nga nag-isyu ang North sang notice of a military reconnaissance satellite launch.
Nag-istorya man ang mga opisyal sang United States, Japan, kag South Korea kaangot sa sini nga notice kag pareho nga nadiskusyunan nga ang North Korean satellite launch nga nagagamit sang ballistic missile technology ang isa ka paglapas sa resolutions sang United Nations kag isa pa ka daku nga risgo sa regional security.
Nagsugtanay man ang mga opisyal nga mag-demand sa North Korea nga indi pagdayunon ang plano sini.
Matandaan nga sang Nobyembre sang ginlunsar sang North Korea ang ila una nga military spy satellite kun sa diin ila pa gin-claim nga ang satellite ang nakakuha sang surveillance photographs sang US White House, ang Pentagon kag South Korean military installations.
Una man nga ginpabugal sang North Korea nga tatlo ka dugang nga spy satellites ang ila igalunsar subong nga tuig.
