ILOILO – Nagalaom ang Committee on Public Utilities sa Sangguniang Panlalawigan nga padal-an man sila sang imbitasyon sang Metro Pacific Iloilo Water (MPIW) kag Metro Iloilo Water District kaangot sa public hearing sa service improvement kag sa ginaduso nga pagpasaka sang balaydan sa tubig.
Sa interview sang Bombo Radyo kay Ex-Officio Board Member Ramon Sullano, chairman sang nasambit nga komitiba, iya ginpahayag nga kuntani hatagan man sila sang pagrespeto ang water distribution utility.
Suno kay Sullano, luyag nila nga mangin kabahin sang public hearing bangud magluwas nga public officials, konsumidor man sila.
Kun may problema ang pumuluyo sa supply sang tubig, sila man sa gihapon nga mga opisyal ang ginapangayuan sang bulig.
Pinaagi sa public hearing suno sa natungdan, mapalab-ot nila sa water distribution utility ang ila bahin kaangay na lang sang pagpanetensya sang mga konsumidor.
Magluwas pa diri, luyag man mahibaluan ni Sullano ang matuod nga rason sa pagpasaka sang sukot sa tubig apisar indi man maka-supply sang maayo ang water distribution utility.
Mangin ang pagrasyon sang tubig suno sa natungdan ang indi man regular.
Sa subong suno sa natungdan, P20 ang sukot sa per cubic meter.
Apang sa bag-o nga rate, magapasaka sila sang P9.19 per cubic meter sa diin mangin P29.19 ang ang kada cubic meter.
Samtang ang mininum rate naman nga P200 ang mangin P291.90 na sa bag-o nga rate.
