Kun ikaw fan sang isa ka tawo, halos tanan imo himuon agud makakuha sang iya pirma ukon anuman nga bagay nga iya ginapanag-iyahan.
Apang sa South Korea, lain nga lebel ang natabo gin-todo-bash gid sang publiko ilabi na bangud ginpatigayon ini sa sulod sang eskwelahan.
Sang nagligad lamang nga inadlaw sang nag-perform ang popular nga K-Pop group nga Oh My Girl sa isa ka university festival sa Asan, South Chungcheong Province.
Pagkasunod nga adlaw, matunog nga na-istoryahan ang festival bangud sa naglapta nga video kun sa diin ginsugo sang host ang mga lalaki nga kolektahan ang mga suludlan sang tubig nga gingamit sang girl group.
Sunod nga gin-engganyo ang fans nga magpasakop sa talent show para nga mabaton nila ang tumalagsahon nga premyo nga amo ang water bottle nga naggamit na sang mga myembro sang Oh My Girl.
Sang gin-ulan na sang pagpakamalaot, nag-sorry ang host bangud suno sa iya, ginpinsar niya nga isa ini ka memorable gesture apang baliskad gali ang natabo.
Gin-ako man niya nga iya ini sala bangud sa iya poor judgement kag naghingyo nga indi na pagdalahigon ang mga estudyante. Nag-sorry man ang student council nga amo ang nag-organisar sang festival apang madamo gihapon ang wala nahim-os ilabi na online. Gintawag ini nga low-class kag bastos nga sahi sang mindset kag kun ngaa nabatas ini nga himuon sa ila mismo idols nga mga babaye man.
