ILOILO CITY — Naghingyo ang Department of Public Works and Highways (DPWH) Region 6 sa Iloilo City Council nga magpatawag sang special session agud maistoryahan ang pagpa-untat sang construction sang sea wall sa Barangay Rizal Pala-Pala kag Tanza Bonifacio, Iloilo City.
Ini ang kasunod man sang pagdagdag sang konseho sang resolusyon agud temporaryo nga untatan ang konstruksyon sang proyekto.
Sa interview sang Bombo Radyo kay Engr. Sanny Boy Oropel, Reional Director sang DPWH 6, iya ginpahayag nga tuyo sang tikang nga maistoryahan ang P400 million nga sea wall sa nasambit nga lugar ilabi na nga ini ang ginpauntat bangud sa kakulangan sang permit.
Suno kay Oropel, may mga bagay nga wala masyado naitindihan sang city council, isa na diri ang ginapahayag nga may reklamasyon nga nagakatabo samtang ginahuman ang sea wall.
Gin-athag man ni Oropel nga isa ka “stand alone” ang proyekto kag wala sang reklamasyon nga nagakatabo, rason man nga indi na kinahanglan pa nga magkuha sang permit halin sa Philippine Reclamation Authority (PRA).
Naghingyo naman ang natungdan nga lantawon sang konseho ang sitwasyon sang sea wall agud mapat-ud ang kahimtangan sang construction kag liwat nga mapahanugutan nga mapadayon ang paghuman samtang wala pa gid nagsulod ang tig-ululan.
Nahibaluan nga yara na sa masobra 37% ang completion sang proyekto sa diin tuyo sini nga maprotektahan ang mga residente nga malapit sa dagat.
