ALIMODIAN, ILOILO — Maga-updanay sa gihapon si Alimodian, Iloilo Mayor Ian Kenneth Alfeche kag Vice Mayor Jeffrey Calay Alonsabe sa palaabuton nga 2025 midterm elections.
Sa interview sang Bombo Radyo kay Alfeche, iya ginpahayag nga naghilisugtanay sila ni Vice Mayor Alonsabe nga mag-updanay sa gihapon, sa diin, ginpabugal pa sini ang ila nangin mabinungahon nga pag-abyanay.
Suno kay Alfeche, dako ang nangin kabahin sang ila pag-intindihanay sang bise-alkalde, rason man nga mas ginpili nila nga mangin isa lang ang pakadtuan nga direksyon.
Ginpahayag man sini nga bilang pagpakita sang suporta sa isa kag isa, nagdesisyon sila nga magpabilin nga mag-updanay ilabi na nga isa lang man ang ila tinutuyo para sa amo nga banwa.
Ginkumpirma man ni Alfeche nga maga-upod sila ni Alonsabe sa pagpanumpa bilang bag-o nga myembro sang Partido Federal ng Pilipinas (PFP) sa Dominggo, Hunyo 2, 2024.
Nahibaluan nga may lima ka opisyales sang banwa ang magapabilin sa idalum sang National Unity Party (NUP), samtang lima naman ang magapanumpa sa Partido Federal ng Pilipinas.
