ILOILO CITY — Nagpangayo sang paghangop ang Western Visayas Alliance of Transport Cooperatives and Corporation kay Iloilo Governor Arthur Defensor Jr. kaangot sa pag-implementar sang 40% nga pagpasulod sang consolidated units halin sa first town municipalities sang probinsya sang Iloilo.
Sa interview sang Bombo Radyo kay Halley Alcarde, Secretary General sang nasambit nga kooperatiba, iya ginpahayag nga posible maapektohan ang ruta sang syudad kun kubug-usan nga 40% ang pasudlon kag indi pagsundon ang 15% nga buffer kag 25% naman sa peak hours.
Suno kay Alcarde, indi na kinahanglan nga hulaton pa ang Local Public Transport Route Plan (LPTRP) sang probinsya sang Iloilo antes pa man mapatuman ang ila ginahingyo.
Nagpanindugan man ini nga mas makapamaayo nga magpabilin sa gihapon sa 25% nga pagpasulod, samtang 15% naman kun rush hour.
Gin-athag man sini nga ang pagpasulod sang mga consolidated units sa syudad ang makatuga lang sang kompetisyon sa tunga sang mga kooperatiba kag public utility vehicles (PUV).
Nahibaluan nga diri lang sa Iloilo City ginapahanugutan nga makasulod ang mga units nga nagahalin sa probinsya bangud sa iban nga syudad, tubtob lamang sa designated parameter boundaries ang mga ini.
