Tuyo sang Partido Federal ng Pilipinas (PFP) nga makapasulod man sang mga myembro halin sa nabilin nga bahin sang Western Visayas nga amo ang Aklan, Antique, Capiz, kag Negros Occidental.
Ini kasunod sang mass oathtaking sang ruling party kahapon, Hunyo 2, kun sa diin nagpanumpa ang halos 800 ka mga opisyal sa syudad kag probinsya sang Iloilo kag amo man ang pila ka elected officials sa probinsya sang Guimaras.
Sa interview sang Bombo Radyo kay South Cotabato Governor Reynaldo Tamayo, Jr., national president sang PFP, iya ginpahayag nga ang recruitment sa bag-o nga mga myembro ang wala lamang nagatuyo nga mapabaskog pa ang suporta sa chairperson sang partido nga si President Ferdinand Marcos, Jr. apang nagatuyo man nga mapasangkad pa ang delivery sang serbisyo.
Tuyo sang PFP nga antes ang eleksyon sa 2025, makuha na sang partido ang masobra katunga sang numero sang provincial chief executives.
Gin-engganyo man sini ang mga luyag pa magsulod sa partido nga i-internalize gid ang lima ka core principles sang partido nga amo ang kahadlok sa Ginuo, humanism, enlightened socialism, direct democracy, kag patriotic federalism.
Bilang sabat, nagpasalamat man ang regional chairperson sang PFP sa Western Visayas nga si Governor Arthur Defensor,Jr. bangud gin-abi-abi sang partido kag ni President Marcos ang mga opisyales sang Iloilo kag Guimaras.
Una naman nga gin-ako sang national president nga nangin mabudlay para sa ila ang pagsulod sa political scene sa Iloilo ilabi na bangud kadam-an sang Ilonggo officials ang wala nagsuporta kay President Marcos sang nagligad nga 2022 elections.
