Madamo ang nagabilib sa isa ka 93-anyos nga media mogul sa Estados Unidos sang Amerika bangud apisar sa iya nga edad, nagpakasal pa ini sa ika-lima na nga tion.
Ini amo si Rupert Murdoch, isa ka Australian billionaire, nga kilala nga may net worth nga $9.77 billion ukon P573-billion.
Ang ginpakaslan sini amo ang iya nobya nga Elena Zhukova, 67, isa ka retired molecular biologist.Ginpatigayon ang ila nga kasal sa Bel-Air, California.
Ang mas interesente pa amo nga nagkilalahay gali sila nga duha kadungan sang kasal ni Rupert sa iya ikatatlo nga asawa, ang Chinese entrepreneur nga si Wendi Deng sang 1999.
Matunog ang pangalan ni Murdoch nga nagapanguna sa media empire sa Estados Unidos sa sulod sang pito ka dekada. Siya ang chairman emeritus sang News Corporation nga nagapanag-iya sang Fox News, Wall Street Journal, Sun kag Times.
Sang nagligad nga tuig sang nagpanaog siya bilang chairman sa Fox kag News Corp kun sa diin ang iya anak nga si Lachlan ang na-designar nga magpamuno sa duha ka mga kumpaniya.
Ang media companies nga iya gindumala ang may masangkad nga nalab-utan kaangay sa outlets, satellites, Hollywood studios, libro, newspapers kag TV stations sa tatlo ka kontinente.
Antes ang iya pagpakasal subong nga tuig, nangin asawa man niya ang anay supermodel nga si Jerry Hall apang nagtapos sa divorce sang 2022.
