𝗜𝗟𝗢𝗜𝗟𝗢 —Natigayon ang groundbreaking ceremony subong nga adlaw sang Bureau of Jail Management and Penology (BJMP) kag Department of Public Works and Highways (DPWH) sa Brgy. Buntatala, Leganes, Iloilo para sa tukuron nga Iloilo City District Jail Building.
Sa interview sang Bombo Radyo kay Jail Director Ruel Rivera, Chief sang Bureau of Jail Management and Penology, iya ginpahayag nga makabig world class facility ang tukuron nga female dormitory sang ahensya.
Suno kay Rivera, ang three-storey building kag pasilidad ang nagabalor sang ₱581 million nga napondohan paagi sa General Appropriations Act.
Ginpahayag man sini nga ang proyekto ang mangin nawong sang bug-os nga Bureau of Jail Management and Penology sa pungsod bangud sa kabahin sang pasilidad ang Administrative Office Building, Health Services Facilty, Kitchen, Visitor’s and Visitation building, Commitment Building kag Recreational area.
Dako naman ang pagpasalamat ni Uswag Ilonggo Partylist Representative Jojo Ang bangud nag-umpisa ang proyekto sa isa lamang ka damgo bag-o sini natigayon nga maplastaran sang budget.
Sa interview sang Bombo Radyo kay Ang, iya ginpahayag nga ginalauman sini nga mahatagan sang mas maayo nga lugar ang mga Persons Deprived of Liberty pinaagi sa pagpatindog sang bag-o nga Iloilo City District Jail Building.
Dugang pa sang natungdan, ginaplanuhan man niya nga butangan sang kaangay nga facility ang probinsya sang Aklan, apang ginpasiguro sini nga unahon anay tapos ang proyekto diri sa Iloilo.
