𝗪𝗘𝗦𝗧𝗘𝗥𝗡 𝗩𝗜𝗦𝗔𝗬𝗔𝗦 — Ginahulat-hulat sang Environmental Management Bureau sang Department of Environment and Natural Resources (DENR) Region 6 ang ila gin-request nga equipment halin sa central office agud nga matumod kun may presensya sang sulfur dioxide (SO2) sa Western Visayas matapos maglupok ang Bulkan Kanlaon.
Ini kasunod man sang forecast sang Copernicus Atmosphere Monitoring Service (CAMS) nga ang sulfur dioxide gikan sa Bulkan Kanlaon ang makit-an nga kaangay sang alipuok ukon gal-um sa bahin sang Mindanao, Palawan, kag pila ka bahin sang nabagatnan sang Luzon kag Visayas.
Sa interview sang Bombo Radyo kay Atty. Ramar Niel Pascua, Regional Director sang Department of Environment and Natural Resources (DENR) Region 6, iya ginpahayag nga na-record sa Brgy. Ara-al, La Carlota, Negros Occidental ang 56 micrograms cubic meter fair sang sulfur dioxide nga nakit-an sa hangin sang Hunyo 4, nga may kalayuon nga 10 kilometers halin sa bulkan.
Suno kay Pascua, sang Hunyo 5, na-record man sa amo nga lugar ang 37 micrograms cubic meter fair sang sulfur sa hangin, samtang sa Brgy. Cabagnaan, La Castellana, Negros Occidental naman nga may lima ka kilometros ang kalayuon sa bulkan, na-record ang 32 micrograms cubic meter fair sang sulfur dioxide sa hangin sang kapareho nga time span.
Nagpaathag man si Pascua nga sa subong, indi pa makumpirma kun may yara sang presensya sang sulfur dioxide sa hangin sa pila ka mga parte sang Western Visayas.
Nagpasalig man ini nga magahatag sang gilayon nga abiso sa publiko kun makaabot na ang gin-request nga equipment agud mapaguwa man ang mangin resulta sang tests sang hangin sa rehiyon.
