𝗜𝗟𝗢𝗜𝗟𝗢 𝗖𝗜𝗧𝗬 — Gina-establisyar sa gihapon sang Scene of the Crime Operatives (SOCO) ang rason sa likod sang kamatayon sang isa ka babaye nga nasapwan-patay sa ila puluy-an sa Brgy. Bakhaw, Mandurriao, Iloilo City.
Ang biktima amo si Zyra Sonza, 22, may isa ka bata, kag ika-duha sa apat ka mga anak ni Joseph Sonza nga ginluthang-patay sang riding in tandem sa banwa sang Calinog, Iloilo sang nagligad nga bulan sang Mayo.
Sa interview sang Bombo Radyo kay Rodolfo Beñas, Barangay Tanod sang nasambit nga lugar, iya ginpahayag ulihi nakit-an nga buhi ang biktima kagina sang udto, subong nga adlaw.
Suno kay Beñas, mismo ang menor nga anak sang biktima ang nagasinggitan kag naghambal nga patay na ang iya iloy sa diin, ginkapuwag sang mga kaingod nila nga panimalay.
Ginpahayag man sini nga posible nga ginbatyag sang biktima ang kamatayon sang iya amay, sa diin, masami nga makit-an sang natungdan nga magka-upod ang duha sang sila ang buhi pa.
Ginahulat pa sang otoridad ang mangin desisyon sang pamilya kun ipaidalum sa autopsy test ang ila nagtaliwan nga himata.
Nahibaluan naman nga buwas kuntani nga adlaw ilubong ang amay sang biktima.
Padayon naman nga ginapadalman sang otoridad ang imbestigasyon agud matumod ang rason sa likod sang nangin kamatayon sang biktima.
