ILOILO CITY- Nagapati ang hepe sang Mandurriao Police Station nga wala sang foulplay sa kamatayon sang babaye nga nasapwan nga wala na sang kabuhi sa sulod sang ila balay sa Barangay Bakhaw, Mandurriao, Iloilo City.
Ang biktima amo si Zyra Sonza, 22, may isa ka bata, kag ika-duha sa apat ka mga anak ni Joseph Sonza, ang negosyante nga ginluthang-patay sang riding in tandem sa banwa sang Calinog, Iloilo sang nagligad nga Mayo.
Suno kay Police Captain Val Cambel, wala sang may nakit-an nga pilas sa lawas ni Kay-Kay nga posible mangin patimaan nga may natabo nga krimen.
Pahayag niya, bag-o napatay si Zyra, nagabatyag ini sang pagpin-ot sang dughan base man sa panugiron sang iya pamilya.
Nahibaluan nga nasapwan ini nga patay sang iya mga kasilingan sang nagsinggit ang iya apat ka tuig nga bata.
Ginatugyan naman sang hepe sa pamilya kun ipaidalom nila sa autopsy ang ila himata.
