𝗜𝗟𝗢𝗜𝗟𝗢 —Magatukod sang steering committee ang Partido Federal ng Pilipinas (PFP) agud hitsuon ang problema kun hinali nga may magbunggo-anay nga kaalyansa nila nga Partido sa 2025 midterm elections.
Sa interview sang Bombo Radyo kay South Cotabato Governor Reynaldo Tamayo Jr., National President sang Partido Federal ng Pilipinas (PFP), iya ginpahayag nga kun indi gilayon nga makay-o ang mga Partido, ipatuman ang free zoning kun hinali nga magbunggu-anay gidmanang mga kaalyado nga Partido.
Suno kay Tamayo, ang katungdanan sang komitiba, amo ang istoryahon ang mga kandidato kun magahatag bala sang kahigayunan nga magpaiway agud indi magbunggu-anay ilabi na kun sa idalum sila sang kaalyado nga Partido.
Ginpahayag man ni Tamayo nga importante ang common cause sang Partido nga suportahan ang administrasyon ni Presidente Ferdinand Marcos Jr.
Ginalaum naman sang gobernador nga maglab-ot sa apat tubtob lima ka mga partido ang magadugang sa mga nauna na nga nagpakig-alyansa.
Nahibaluan nga duha sa national nga mga partido ang nagpakig-alyansa sa Partido Federal ng Pilipinas nga amo ang Nationalist People’s Coalition kag Lakas–Christian Muslim Democrats (LAKAS-CMD).
