𝗜𝗟𝗢𝗜𝗟𝗢 𝗖𝗜𝗧𝗬 — Dakop ang isa ka indibidwal matapos nga nakuhaan sang kapin P1 million nga balor sang iligal nga droga matapos nga nagpatigayon sang drug buy-bust operation ang Drug Enforcement Team sang Iloilo City Police Station 1 sa Brgy. Rizal Palapala II, Iloilo City Proper.
Ang subject amo si alyas “Jiji”, 39, isa ka kargador, kag residente sang nasambit nga lugar.
Sa interview sang Bombo Radyo kay Police Captain Roque Gimeno III, Chief of Police sang Iloilo City Police Station 1, iya ginpahayag nga malapit isa ka tuig nga gina-monitor sang orotidad ang subject bangud madanlog ini nga madakpan, apang bangud sa bulig sang mga residente kag Police intelligence, natigayon nga nakuhaan sang 11 sachets sang shabu nga may kabug-aton nga 150 grams kag nagabalor sang P1, 020, 000.
Suno kay Gimeno, ang subject mismo ang nagakuha sang iligal nga druga sa ila nga main source nga si alyas “Sabu”, apang kun wala sang kuhaan, nagakadto man ini sa iya isa ka source nga si alyas “Bulldog”.
Ginpahayag man ni Gimeno nga indi sila mag-untat tubtob indi magkalaubos ang mga durugista sa syudad bangud isa ini sa ginatugahan sang krimen sa Iloilo City.
Nahibaluan nga anay na nadakpan ang subject sang 2017 apang nakaguwa sang 2019 sa bulig sang plea bargaining agreement.
Preso na ang subject sa Iloilo City Police Station 1 kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
Dako naman ang pagpasalamat sang opisyales sang Brgy. Rizal Palapala II, Iloilo City Proper sa pagtutok sang Iloilo City Police Station 1 sa ila nga lugar agud matapna ang iligal nga druga.
Sa interview sang Bombo Radyo kay Punong Barangay Judy Nonoy Navales, iya ginpahayag nga kaupod ang iya nga mga kagawad, wala sila nagapabaya sa pagbantay kag monitor sa mga persona sa ila lugar nga imbolbado sa iligal nga droga.
Suno kay Navales, indi pa matumod sa subong ang numero sang mga indibidwal nga ila gina-monitor bangud masami nga nagalumpat-lumpat sang lokasyon.
Ginpahayag sang natungdan nga indi sila mag-untat nga maglibot agud nga mapapas ang mga durugista sa ila barangay.
Gin-athag man sini nga isa ka pabor para sa ila ang maaresto ang mga naga-engage sa iligal nga droga, bangud tuman ini ka makaalarma para sa mga residente.
Nagpanugyan man ini sa pumuluyo nga likawan ang paggamit sang iligal nga druga bangud madamo sang pwede pangabuhian sa ila nga lugar, kaangay na lamang sang pagbaligya sa merkado.
