𝗦𝗔𝗡 𝗠𝗜𝗚𝗨𝗘𝗟, 𝗜𝗟𝗢𝗜𝗟𝗢 — Nagapabilin nga wala sang alagyan ang mga pumuluyo sa Sitio Unas, Brgy. Sta. Cruz, San Miguel, Iloilo bangud sa ginpasirado sang nagpakilala nga tag-iya sang alagyan.
Sa interview sang Bombo Radyo kay Mr. Florante Acebuque ,
iya ginpahayag nga kahapon nga adlaw sang Dominggo, ginsiradhan ang amo nga dalan, sa diin, ini ang padulong kuntani sa main road sang lugar.
Suno kay Acebuque, yara sa 640 meters ang nasiradhan nga alagyan ukon right of way halin sa ila nga puluy-an tubtob sa main road.
Ginpahayag man sini nga ang naga-claim sang duta amo Femie Montaño sa amo nga lugar, apang sang ginpangayu-an sang mga dokumento agud mapamatud-an ang claim, wala sila sang may napakita.
Gin-athag man ni Acebuque nga ang pamilya Flora ang nagapanag-iya sang amo nga duta, sa diin, sila ang ang naghatag sang pahanugot nga magamit ang amo nga alagyan.
Nahibaluan nga ang alagyan ang isa sa mayor nga dalan nga ginaagyan sang mga pumuluyo sa matag-adlaw, apang bangud sa ginpasirado, nagtuga ini sang huol sa mga residente nga nagatrabaho kag nagaguwa sa ila panimalay agud mangabuhi.
