𝗦𝗔𝗡 𝗝𝗢𝗔𝗤𝗨𝗜𝗡, 𝗜𝗟𝗢𝗜𝗟𝗢 —Personal nga nagpadulong si Iloilo First District Representative Janette Garin agud pamatukan ang pagpasirado ni Vilma Sta. Cruz Getuya, iloy ni San Joaquin Vice Mayor Taba Getuya sang daan nga San Joaquin Mother and Child Hospital.
Sa interview sang Bombo Radyo kay Garin, iya ginpahayag nga ang 1,900 square meters nga duta nga ginatindugan sang amo nga hospital ang gindonar sang lolo ni Vice Mayor Taba Getuya sa Local Government Unit (LGU) sang San Joaquin.
Apang santo sa kopya nga nakuha sang Bombo Radyo Iloilo nga deed of donation, nakasaad nga ang 1,900 square meters nga duta, ang gindonar ni Vilma Sta. Cruz Getuya agud mangin extension sang Western Visayas Medical Center (WVMC) nga ginselyohan sang Marso 3, 2003.
Suno naman kay Garin, ginkakibot nila ang pag-claim sang pamilya Getuya nga gin-revoke ang ila nga donasyon sang nagligad nga tuig.
Apang santo naman sa kopya sang Revocation sang Deed of Donation sang abogado sang pamilya Getuya, nagaguwa nga sang Mayo 6, 2024, nagpadala sila sang sulat nga naka-address Western Visayas Medical Center agud bawion ang gindonar nga duta, bangud ginapahayag nga wala na ini ginagamit sang nasambit nga ospital.
Nakasaad naman sa page 2 sang sulat, nga ginahatagan sang 15 days ang WVMC agud i-turn over ang propedad sa pamilya Getuya.
Nagpanindugan naman si Rep. Garin nga apisar may extension ang San Joaquin Mother and Child Hospital , ginagamit sa gihapon ang daan sini nga pasilidad bangud diri nakahamtang ang Radiology Department.
Nahibaluan nga nagpadulong ang mamalidha sa amo nga ospital bangud indi pagpasudlon ang mga personnel sang San Joaquin LGU kag WVMC.
Nagbutang naman ang pamilya Getuya sang cyclone wire sa entrance sang ospital nga may nakasaad nga “No Entry, Private Property”.
Nagapati naman si Garin nga ang tikang sang pamilya Getuya nga pagbawi sang duta nga ginahamtangan sang hospital, ang may bahid sang pamulitika.
Yari aton pamatian ang kabahin sang pagsabtanay ni Iloilo First District Representative Janette Garin kag sang iloy ni iloy ni San Joaquin Vice Mayor Taba Getuya nga si Vilma Sta. Cruz Getuya.
