Mismo ang boxing legend kag Filipino pride nga si Manny Pacquiao ang nagkumpirma nga may mga negosasyon para sa iya comeback kag potensyal nga world title fight.
Ginpahayag ini sang 45-anyos nga Pinoy boxer matapos ang pag-anunsyo nga nagpirma ini para sa three-round 68kg boxing match batok sa Japanese mixed martial artist nga si Chihiro Suzuki sa Saitama, Japan sa Hulyo 28.
Suno kay Pacquiao, ginahitso pa ang away sini batok sa American fighter nga si Mario Barrios para sa WBC welterweight world title apang wala pa sang klaro sa diskusyon.
Posible nga Nobyembre ukon Disyembre suno pa sa anay senador.
Pebrero sang gin-anunsyo nga napaslawan si Pacquiao sa iya tuyo nga marepresentar ang Pilipinas sa Paris Olympics bangud ginbasura sang International Olympic Committee ang special request bangud lapaw na ang iya edad sa 40-anyos nga limit.
Matandaan nga nag-retiro si Pacquiao sang 2021 matapos ginlutos sang Cuban boxer nga si Yordenis Ugas sa Las Vegas nga amo na ang nagmarka sang iya pinal nga professional fight.
Nagpadalagan ini sa pagka-presidente sa Mayo 2022 elections apang nalutos.
Sang Disyembre 2022, nagbalik ini sa ring sa Seoul, South Korea para sa isa ka exhibition fight.
