Ginatudlo nga tinikal nga istorya sa ilimnan amo ang nagtulod sa suspek nga patyon ang iya man lang pakaduha sa Barangay Morcillas, Tubungan, Iloilo.
Ang biktima amo si Journal Tacan, 33, residente sang Brgy. Lanag Norte sa amo nga banwa samtang ang suspek amo naman si Rodel Tabuloc, 41, residente sang Brgy. Morcillas.
Sa interview sang Bombo Radyo kay Police Captain Alberto Manguilimotan, Jr., hepe sang Tubungan Municipal Police Station, iya ginpahayag nga antes ang krimen, magkaupod pa nga naga-inom ang duha.
Sang nakuntento na sa pag-inom, nagkadto na ang biktima sa balay sang iya himata agud magtulog. Ginpahayag nga naggamit ang suspek sang binangon agud lab-on ang liog sang biktima.
Nag-sungka ang suspek kag gin-ako sa interview sang pulis nga nasuya lang ini sa tinikal ni Tacan rason nga nahimo sini ang krimen. Ginalantaw man sang pulis nga rason man ang kahulugbon kun ngaa natabo ang insidente.
Nagapabilin sa custodial facility sang Tubungan Municipal Police Station ang suspek kag natalana nga pasakaan sang kaso nga murder subong nga Martes, Hunyo 11.
