ILOILO CITY- Nagpirma sang Memorandum of Understanding (MOU) ang Electric Vehicle Association of the Philippines (EVAP) kag China Council for the Promotion of International Trade Automotive Sub-Council (CCPIT-Auto) agud mapabakod ang kolaborasyon sa tunga sang Pilipinas kag China partikular sa industriya sang electric vehicle.
Ang signing ceremony ginpatigayon sa China Auto Chongqing Summit sa Chongqing, China.
Suno kay EVAP Chairman Rommel Juan, ang partnership isa ka landmark deal, nga nagatuyo nga mapasanyog ang kapabilidad sa pagpadasig sang growth kag adoption sang electric vehicles.
Ginpahayag man ni Juan nga ini nga kolaborasyon magabukas sang bag-o nga kahigayunan para sa knowledge sharing, investment opportunities, kag development sang sustainable transportation solutions.
Sa bahin naman ni CCPIT-Auto Assistant Chairman James Chai, iya ginpahayag nga ang China kag ang Pilipinas ang may pareho nga vision para sa palaabuton sang sektor sang transportasyon.
Dugang ni Chai, ini magaduso pa gid sang industriya sang electric vehicle nga makabenepisyo ang magtimbang nga pungsod kag makabulig para sa global sustainability goals.
