ILOILO CITY- Nakarekober ang Police Regional Office 6 sang kapin P8.1 million nga balor sang iligal nga druga sa sulod sang isa lang ka adlaw nga mga operasyon.
Base sa data sang opisina, 13 tanan ka operasyon ang ginpatigayon humalin sang Hunyo 11 tubtob 12 sang aga nga nagresulta naman sa pagkaaresto sa 23 ka mga drug personalities.
Sa sini nga numero sang mga drug personalities, siyam ang naaresto sang Regional Police Drug Enforcement Unit 6; anum ang iya sang Iloilo Police Provincial Office; apat gikan sa Negros Occidental Police Provincial Office; kag tag-isa ang naaresto sang police provincial office sang Capiz kag Guimaras, kag amo man sa Bacolod City Police Office kag Iloilo City Police Office.
Suno kay Brigadier General Jack Wanky, director sang Police Regional Office,may dako nga kontribusyon sa madinalag-on nga mga operasyon amo ang kooperasyon ang komunidad.
Nagpangabay naman ini sa pumuluyo nga ipahibalo gilayon sa otoridad kun may mamutikan nga mga indibidwal nga involved sa illegal drug trade.
