ILOILO – Wala pa nakagwa sa Pilipinas ang driver sang BMW sports car nga hungod nga nagbunggo sa mag-asawa sa Barangay Pandac, Pavia , Iloilo.
Ang suspek amo si Rudolph ‘Bobot’ Chavez Dela Rosa, negosyante sang trucking services kag residente sang Calinog, Iloilo.
Sa amo nga insidente, patay gid si Rave Garcia, 33, samtang pilason naman ang asawa sini nga si Shefryl Madadero Garcia, 23, lunsay residente sang Brgy. Onate De Leon, Mandurriao, Iloilo City.
Sa interview sang Bombo Radyo kay Iloilo Police Provincial Office Director Police Colonel Bayani Razalan, iya ginpahayag nga santo sa ila monitoring, nagapabilin sa gihapon sa pungsod si Dela Rosa.
Suno kay Razalan, ginahulat na lang ang warrant of arrest batok kay Dela Rosa.
Tatlo naman ka sampaw-sampaw nga kaso ang ginpasaka sa suspek.
Ini amo ang murder, frustrated murder kag malicious mischief.
Samtang ang nahamtangan sang sports car nga gingamit sa pagbunggo-patay sa mag-asawa ang padayon pa nga ginatumod.
Gin-athag man ni Razalan nga wala sila sang pasin-uhon sa pagpatuman sang layi.
Nagpanawagan man ini sa suspek nga magsungka na sa mga otoridad.
