𝗜𝗟𝗢𝗜𝗟𝗢 𝗖𝗜𝗧𝗬 — Nagpanawagan ang pila ka mga kooperatiba sa Land Transportation Office (LTO), Land Transportation Franchising and Regulatory Board (LTFRB) Region VI, kag Department of Transportation (DOTr) nga klarohon ang tinutuyo nga pag-implementar sang Public Utility Vehicle Modernization Program (PUVMP).
Sa interview sang Bombo Radyo kay Halley Alcarde, Secretary sang Western Visayas Alliance of Transport Coopeatives and Corporations Inc. (WVATCCI), iya ginpahayag nga bangud sa pagduso sang gobyerno sang amo nga programa, napilitan sila nga magpangutang sa bangko agud magbakal sang mga modernized jeepneys, sa diin, tubtob subong, ginabayaran nila sa gihapon kada bulan.
Suno kay Alcarde, tuman ka kulang ang ila nga income kun ilakip ang ila bulanan nga balayran, ilabi na nga halos sa mga colorum ang ginakuha ang ila kuntani nga kita.
Ginpakamalaut man sini ang indi pagdakop sang mga nasambit nga ahensya sa mga colorum nga jeep nga nagabyahe sa dalan.
Naglaum man ang natungdan nga mahatagan sang igtalupangod ang ila nga mga ginaproblema ilabi na nga sila ang isa man sa mga nagasuporta sa pagpatuman sang Public Utility Vehicle Modernization Program.
