𝗜𝗟𝗢𝗜𝗟𝗢 𝗖𝗜𝗧𝗬 — Nagpanindugan si Iloilo Clity Mayor Jerry Treñas nga pinal kag indi na magbag-o ang iya nga desisyon nga ideklara nga persona non grata si Iloilo City District Engineering District Engineer Roy Pacanan, apisar nga nagpaguwa ini sang open letter bilang pagpaathag.
Sa interview sang Bombo Radyo kay Treñas, iya ginpahayag nga indi siya anad nga magliwat-liwat sang iya nga desisyon, rason nga padayunon sini nga ideklara nga persona non grata si Engr. Pacanan sa Iloilo City.
Suno kay Treñas, sa sulod sang 40 ka tuig nga pagtinir sang Department of Public Works and Highways (DPWH) sa duta sang city government, wala sila sang may napakita nga dokumento kun paano nila nagamit ang duta.
Ginpahayag man ni Treñas nga kinahanglan sang syudad ang duta para sa Iloilo City Community College (ICCC) agud nga masolusyonan ang nagapadayon nga pagsaka sang numero sang mga estudyante nga naga-eskwela sa amo nga buluthuan.
Ginlaragway man sang alkalde nga ang sulat ni Pacanan ang daw “ka suplado” pa, rason man nga ginduso sini ang tikang nga ideklara sini si Pacanan nga persona non grata.
Gintumod man sang natungdan nga nangin rason man ang pila ka mga proyekto sang Iloilo City District Engineering Office nga nagalab-ot sa apat tubtob lima ka tuig nga indi matapos-tapos.
