Literal nga sabaw ang gindangatan sang isa ka buwaya matapos ini nga nagpangaon sang mga hinuptanan nga ido sa isa ka komunidad.
Natabo ini sa Australia kun sa diin naga-ugtas na ang mga residente bangud magluwas nga nagapanglamon sang ido, ini nga buwaya ang nagapamahog pa sang mga kabataan kag nagatuga sang tuman nga kahadlok.
Nagalaba ini nga sapat sang 3.6 metros.
Ginapahayag nga sang nagbinaha sa temprano nga bahin subong nga tuig, nagtakas ini nga buwaya kag nagsaylo sang ilistaran sa Baines River ukon ang suba nga malapit kaayo sa mga balay sang mga tawo sa Bulla community.
Bangud sa reklamo sang mga pumuluyo nga nagakadula ang ila mga hinuptanan, nagpatunga na ang pulis kag nagpatigayon sang konsultasyon sa mga tigulang kag traditional landowners sa Bulla.
Ini ginplanuhan nga tiruhon ini kag wala gid sang nagpamalabag bangud sang oras nga patay na ang sapat, nag-preparar pa gani sang fiesta ang mga tawo. Ang ending? Gintunga-tunga ang lawas sini suno sa Northern Territory Police kag ginluto sa nagkalain-lain nga putahe.
Lakip diri amo ang crocodile tail soup, barbecue, may ara man nga ginputos sa dahon sang saging kag ginsugba. Isa ka traditional feast ang natabo nga gin-enjoy naman sang mga tawo.
Pagkatapos sini, nag-conduct man ang Parks and Wildlife team sang “crocodile safety session” agud nga mapahibalo sa mga kabataan kun ano ang risgo kun magtinir sa mga suba ukon sa mga lugar nga posible ginatiniran man sang sini nga sapat.
