Nag-updanay ang Estados Unidos, Canada, Japan, kag Pilipinas sa duha ka adlaw nga joint maritime exercise sa sulod sang exclusive economic zone (EEZ) sang Pilipinas sa West Philippine Sea.
Gin-anunsyo ini sang US Pacific Fleet kun sa diin nakasaad man nga ang tuyo sang maritime cooperative activity amo ang pagtib-ong sang freedom of navigation kag overflight kag pabakuron pa ang commitment sang apat ka mga pungsod kaangot sa regional security kag stability.
Sa sini nga aktibidad, gingamit ang apat ka warships kag may mga serye sang maritime maneuvers agud matilawan kag ma-validate ang interoperability sang doctrines, tactics, techniques, kag procedures sang mga armadong-kusog sang apat ka pungsod.
Nahibaluan nga nagapakig-angot ang Pilipinas sa mga pungsod nga nagasuporta sa claims sini sa teritoryo sa West Philippine Sea sa tunga sang agresibo nga mga hulag sang China sa amo nga exclusive economic zone.
Matandaan nga sang nagligad lang nga Abril, nag-upod man sa naval exercises sang Pilipinas sang US, Japan, kag Australia apisar pa sang pagprotesta sang Beijing.
