Nagaapelar ang mga pamilya nga pangitaon ang iban pa nga missing nga hajj pilgrims kasunod sang pagsaka sang numero sang nagkalamatay bangud sa amo nga tuigan nga aktibidad sang mga Muslim nga ginpatigayon sa pihak sang tuman ka init nga tyempo.
Naglampas na sa 900 ang napatay base sa figures nga gin-release sang nagkalain-lain nga mga pungsod.
Kasunod ini sang na-rekord nga 51.8 degrees Celsius nga temperatura sa Mecca nga amo ang holiest city sang Islam sa Saudi Arabia sang nagligad nga Lunes.
Ginabanta yara sa 1.8-million ka mga tawo halin sa nanuhay-tuhay nga mga pungsod ang nagpasakop sa inadlaw nga pilgrimage nga kalabanan ginpatigayon sa guwa apisar pa nagatagiti ang init.
May isa ka Arab diplomat nga nagkumpirma nga sa Egyptians pa lamang, nagtimbuok na sa “at least 600” ang napatay nga mas mataas sa 300 nga na-report sang nagligad nga adlaw.
Lakip naman sa na-report nga missing amo ang wala na-rehistro kag wala sang official hajj permit rason nga wala naka-access sa air-conditioned facilities kun sa diin makapabugnaw kuntani ang pilgrims.
Sa subong, ginabaha ang Facebook kag iban pa nga social media networks sang mga laragway sang mga missing kag sang mga hingyo nga magpaguwa na sang dugang nga mga impormasyon.
Nahibaluan nga ang hajj ang isa sa lima ka pillars sang Islam kag ang timing sini ang ginatumod sang Islamic lunar calendar.
Magluwas sa na-report nga mga patay sa Egypt, nagkumpirma man ang Jordan, Indonesia, Iran, Senegal, Tunisia kag autonomous Kurdistan region sang Iraq nga may yara man sang pilgrims nga napatay halin sa ila nga mga lugar apang wala sang particular nga rason nga ginsapubliko.
Wala sang ginhatag nga impormasyon ang Saudi Arabia kun pila gid ang fatalities, apang na-report sini nga may masobra 2,700 cases sang “heat exhaustion” sang adlaw lamang sang Domingo.
Sang nagligad nga tuig, masobra man sa 200 ka pilgrims ang napatay nga kalabanan halin sa Indonesia.
