Ginpaguwa na sang Armed Forces of the Philippines (AFP) ang makatulublag nga videos kag pictures nga nagapakita kun ano ka-agresibo ang China Coast Guard (CCG) sang gin-atake sini ang mga soldado nga Pinoy kadungan sang routine rotation and resupply mission sa Ayungin Shoal sang Lunes, Hunyo 17.
Sa amo nga misyon, duha ka rigid-hull inflatable boats kag isa ka military-contracted civilian vessel ang gindala sang Pilipinas sa BRP Sierra Madre sa West Philippine Sea.
Kun si AFP Chief General Romeo Brawner ang pahambalon, pirata lang ang makahimo sang kaangay sang ginhimo sang China kun sa diin ginsakaan pa ang sakayan sang Pilipinas, ginkawatan, kag ginpangguba pa pati ang equipment.
“For me, this is piracy already, ‘no? Piracy. Because they boarded our boats illegally. They got our equipment, ‘no? Again… parang mga pirata na po sila doon sa mga ginawa nilang actions na ‘yun,” suno sa heneral.
Gin-athag man sini nga wala lang naghipos-hipos ang mga Pilipino bangud nagbato sila sa kutob sang ila masarangan bisan pa nga mas madamo ang mga Chinese nga sakay sa walo ka mas daku nga vessels kag may dala pa nga patalom nga ila ginhana samtang naga-atubang sa tropa sang Pilipinas.
Ginpakita sang militar ang daku halit sa vessels sang Pilipinas kag ginhungod man guba pati ang windshield, communications, kag navigational equipment sang ginpalibutan nila, ginbutong, kag ginkawatan pa sakayan sang mga Pinoy.
Gingisian pa nila ang inflatable boat sang Pilipinas gamit ang ila mga kutsilyo kag bolo rason nga nagkupos.
Magluwas diri, nakit-an man sa video ang pagsinggit sang mga Chinese sa mga Pinoy, paggamit sang makabululag nga suga, kag pagpahuni sang matingil nga sirena samtang sila ang naga-atake.
Pito ka mga soldado ang nasamaran kag natam-an gid ang isa ka Navy personnel nga si Seaman First Class Underwater Operator Jefferson Facundo nga nautdan gid sang tudlo.
“Our action now is that we are demanding that the Chinese return our rifles and our equipment and we are also demanding from them to pay for the damages that they have caused. Babayaran nila po ‘yun dahil hindi po tayo papayag na ganon lang, sisirain nila yung ating kagamitan at kunin lang nila,” pahayag ni Brawner.
Nahibaluan nga sa kada resupply missions sa Ayungin Shoal, wala ginatugutan ang military personnel nga magdala sang ila pusil agud nga malikawan nga magsaka ang tension sa amo nga teritoryo. Ini man ang rason kun nga civilian ships kag sa sini nga tion inflatable boats ang dala sang Philippine Navy kag indi ang mas daku nga mga barko.#
