𝗝𝗔𝗥𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Gintawag nga “wala sang pulos” sang pila ka mga residente ang proyekto sang Department of Public Works and Highways (DPWH) nga slope protection nga sakop sang Dungon Creek sa Brgy. Desamparados, Jaro, Iloilo City.
Sa interview sang Bombo Radyo kay Toto Jerix, tagreklamo nga residente, iya ginpahayag nga bangud sa wala matapos-tapos ang pag-install sang mga tamburong, nagkalasab-it ang mga basura, rason nga tuman ka hinay ang ilig sang tubig nga nangin kabangdanan man sa pagsaka sang lebel sang tubig-baha.
Suno kay Jerix, madasig nga nagasulod ang tubig-baha sa ila nga mga puluy-an kag daw kaangay na lamang nga sila ang ginpabay-an sang mga opisyal kag sang kontraktor sang amo nga proyekto.
Ginpahayag man sini nga para sa ila, indi na ini bag-o nga sitwasyon bangud masami nga nagakatabo ini kun tag-ululan, apang mas naglala bangud sa konstruksyon sang nasambit nga proyekto.
Nagpanawagan man ang natungdan nga kuntani mahatagan sila sang igtalupangod bangud tuman sila nga naapektohan sang pagbaha kun tig-ululan.
