𝗜𝗟𝗢𝗜𝗟𝗢 𝗖𝗜𝗧𝗬 — Nakatalana nga ipatawag sang Committee on Engineering, Construction, and Public Works sang Iloilo City Council ang Department of Public Works and Highways (DPWH) may kaangtanan sa request sang ahensya nga padayunon ang construction sa seawall sa Brgy. Rizal Pala-Pala 1, 2, kag Tanza Bonifacio, Iloilo City sa sulod sang pulo ka adlaw.
Sa interview sang Bombo Radyo kay Iloilo City Councilor Johnny Young, Chairman sang Committee on Engineering, Construction, and Public Works, iya ginpahayag nga apisar nga may order sang cease and desist si Iloilo City Mayor Jerry Treñas batok sa konstruksyon, magapatawag sa gihapon sang committee hearing.
Suno kay Young, magapatigayon sang onsite inspection ang ila nga komitiba agud nga i-presentar sa patigayunon nga hearing kaangot man sa pagpadayon sang construction.
Ginpahayag man sang natungdan nga nakatalana na nga ipa-schedule ang hearing kag ipatawag ang kontraktor, mga opisyal sang barangay, kag ang legal nga bahin agud nga matuktokan ini.
Ginalantaw man sang komitiba sa paghatag sang pulo ka adlaw nga construction ang na-deliver na nga mga kagamitan agud nga indi ma-damage.
Posible naman nga sa masunod nga semana ipatuman ang committee hearing apang nakadependi sa availability sang mga natungdan nga opisina.
