𝗜𝗟𝗢𝗜𝗟𝗢 𝗖𝗜𝗧𝗬 — Nakabaton sang landline call ang Iloilo City Budget Office halin sa isa ka indibidwal nga nagpakilala nga siya si Police Colonel Joeresty Coronica nga amo ang Director sang Iloilo City Police Office (ICPO).
Sa interview sang Bombo Radyo kay Ms. Viminale Capulso, Department Head sang Iloilo City Budget Office, iya ginpahayag nga nagpangayo ang indibidwal sang pangalan sang caterer kag naghinyo nga tawgan siya sang tag-iya sang catering.
Suno kay Capulso, gilayon siya nga nagpangayo sa ila nga admin sang number sang caterer agud nga ihatag sa indibidwal nga nagpakilala nga si Director Coronica, sa diin, nangakig pa ini bangud ginhatagan sand duha ka option.
Sang nahatag na ang ginapangayo nga numero, gilayon nga nag-istoryahanay ang nagapakilala nga si Director Coronica sa manager sang catering.
Liwat nga nangakig ang indibidwal kay Capulso bangud sa tuyo sini nga istoryahon ang tag-iya gid sang catering kag indi ang manager sini.
Bangud diri, ginkaakig sang natungdan ang gin-akto sa iya sang amo nga indibidwal.
Nagkoordinar naman si Capulso sa Public Information Office sang Iloilo City agud nga ipakigbahin ang iya nga eksperyensya nga nangin rason man agud nga mahibaluan sini nga isa ka peke nga Coronica ang nagtawag sa iya.
Ini ang ginkumpirma man sang Iloilo City Police Office nga peke kag indi si Director Coronica ang nagtawag kag nagpangayo sang numero sang catering.
Nahibaluan nga tuyo kuntani sang scammer magpa-catering bangud may pagahiwaton ini nga aktibidad nga lakipan sang kapin 200 ka mga bisita.
