Ipatuman na epektibo sa Hulyo 1 ang “proper dress code” sa mga sumilimba sa Jaro Metropolitan Cathedral.
Sa interview sang Bombo Radyo kay Reverend Father Angelo Colada, director sang Archdiocese of Jaro-Social Communications Office, iya ginpahayag nga pormal nga panapton ang gina-require sa mga tumuluo — kaangay sang dress (kun mahimo) sa mga babaye, kag polo shirt naman kag pantalon para sa mga lalaki.
Ginadumilian ang pagsuksok sang mga sando kag shorts kag panapton nga wala nagakabagay sa sulod sang simbahan.
Suno kay Colada, madugay na nga ginapatuman mangin sa iban nga mga parokya ang nagakaigu man nga panapton kun magsimba, gani ang tikang sang Jaro Cathedral ang makabig nga “pahanumdom” lang sa mga tawo kaangot sa ila suksukon.
Gin-athag man sang natungdan nga indi man pagdumilian nga magsulod sa simbahan ang wala nagasunod sa dress code, apang ipahanumdom lang nga indi na pagsuliton ang pagbayo sang kaangay sini sa liwat nga pagsulod sa katedral.
“Naga-disseminate kita subong sang information para indi na maglab-ot sa punto nga hambalan ka ukon sukmaan ka because it might be offending sa imo part. Kun aware ka na, dapat panumdom ka anay kun ano ang dapat mo suksukon. Ang simbahan wala nagakulang sa pagpahanumdom,” pahayag sang natungdan.#
