𝗜𝗟𝗢𝗜𝗟𝗢 𝗖𝗜𝗧𝗬 — Nagpanugyan ang National Telecommunications Commissions (NTC) Region 6 sa mga Ilonggo nga mangin vigilante kag indi gilayon magpati sa mga impormasyon nga mabaton sa ila nga simcard paagi sa text.
Sa interview sang Bombo Radyo kay Atty. Deo Virgil Tan, Legal Officer sang National Telecommunications Commissions, iya ginpahayag nga lantawon gid ang mga ginapindot online ukon offline kag i-verify kun ini ang isa ka lehitimo ukon indi.
Suno kay Tan, ginadumilian man sang ahensya ang magbaligya sang registered simcards bangud sa idalum sang Republic Act No. 11934 ukon SIM Registration Act posible mapreso sang anom ka bulan tubtob duha ka tuig kag magbayad sang danyos nga P300,000 kun malapas ang amo nga layi.
Nagpaathag man ang natungdan nga ang ahensya ang wala nagatago sang data base sang mga simcards bangud sa idalum sang layi, ang mga telecommunications services ang responsable sa amo nga tikang.
Nagpanugyan man ini sa publiko nga gilayon i-report sa ila Facebook Page kag online website sang National Telecommunications Commissions agud nga mahatagan sang igtalupangod kag ma-deactivate ang mga numero sang scammers.
Bukas naman ang opisina Consumer Welfare Protection Division sang ahensya sa Brgy. Quintin Salas, Jaro, Iloilo City agud atubangon ang mga issues kag concerns may kaangtanan sa text scam.
