𝗜𝗟𝗢𝗜𝗟𝗢 𝗖𝗜𝗧𝗬 — Temporaryo nga ginsirado ang isa ka bakery sa Iloilo City nga nakit-an nga may nagalagaw-lagaw nga daga sa sulod sang estante sini.
Sa interview sang Bombo Radyo kay Rudy Catahay, Chief Sanitation Division sang Iloilo City Health Office, iya ginpahayag nga matapos nga nag-viral sa social media ang video, gilayon nga nagpadulong ang ila nga opisina sa amo nga bakeshop agud nga sekyaron ini.
Suno kay Catahay, sa ila nga pagpadulong, nagpatuman sila sang inspeksyon, samtang nagpatuman naman ang tag-iya sang bakery sang pest control kag gilayon naman nga ginlimpyohan ang amo nga shop.
Ginalantaw naman sang natungdan nga posible nga may kapabayaan sa bahin sang nagabantay, bangud bukas ang estante sini sang nagsulod ang daga.
Gin-athag naman ni Catahay nga wala sang cancelation ukon suspension nga matabo batok sa bakeshop bangud kompleto man ang ila nga permits kag requirements.
Nagpanugyan man ini sa mga nagabantay sang tinapayan nga dapat maghalong kag i-maintain ang kalimpyo sa ila nga bakeshop agud indi makontamina ang mga ginabaligya nga pagkaon.
Nahibaluan nga nakasulod ang daga sa bakeshop bangud napabay-an nga bukas ang estante matapos nga may nagbakal.
