ILOILO CITY – Nagalaom si Iloilo City Lone District Rep. Julienne ‘Jamjam’ Baronda nga indi malaktan sang pamulitika ang selebrasyon sang Pride Month kag mga paliga sa syudad.
Ini matapos naglapta ang sreenshot nga nakabutang nga indi makapakigbahin sa selebrasyon sang Pride Month ang sin-o man nga nagasuporta sa iban nga partido.
Sa amo nga screenshot, nabutang man nga ang Pride Fiesta parade ang sa idalom sang administrasyon sa pagpanguna ni Raisa Treñas kag Team Uswag kag ang nagasuporta sa lain nga partido ang indi welcome sa organisasyon.
Magluwas diri, nag-angkon man sang indi pag-intindihanay ang Sangguniang Kabataan (SK) sang South Baluarte, Molo, Iloilo City kag ang ila nga Punong Barangay nga si Ronald Grandeza bangud indi sini luyag nga suksokon sang mga players ang jersey nga may logo nga “Gugma” ni Baronda.
Sa interview sang Bombo Radyo kay Baronda, iya ginpahayag nga kuntani maghugpong ang mga myembro sang lesbian, gay, bisexual, transgender, and queer community (LGBTQ community) kag indi mag-inaway bangud lang sa politika.
Amo man sa tion sang mga liga, nagakadapat man suno kay Baronda nga indi ini paglaktan sang pamulitika.
Ginpahayag ni Baronda nga bukas siya para sa tanan nga mga luyag magpangayo sang bulig apisar kaalyado man ukon indi.
