Apisar ginplastar nga para sa “best interest” sang Department of Education (DepEd) ang iya pag-resign bilang tiglikom, gin-ako ni Vice President Sara Duterte nga may kasubo man siya nga nabatyagan sang ginbuy-an sini ang posisyon.
Ini bangud suno sa iya, ginpalangga niya ang iya trabaho bilang DepEd Secretary.
“‘Yung pagpunta ko sa mga schools, pakikipag-usap ko sa mga estudyante at pakikipag-usap ko sa mga guro, minahal ko talaga ‘yung trabaho ko kaya nalulungkot ako,” suno sa bise-presidente.
Matandaan nga sang ginkumpirma ang iya resignation sang Hunyo 19, wala sang ginhatag nga rason si Sara apang gin-antisipar na sang iban nga bangud ini sa nagadaku nga away sa tunga sang mga Marcos kag Duterte.
“Mga kababayan, ang aking pagbibitiw ay hindi lulan ng kahinaan kundi dala ng tunay na malasakit para sa ating mga guro at kabataang Pilipino,” kabahin anay sang iya statement nga ginbasa sang nagligad nga Myerkules.
Nagpanaog man siya sa pwesto bilang co-vice chairperson sang National Task Force to End Local Communist Armed Conflict, apang gin-athag sini nga magapabilin siya bilang vice-president sang Republika ng Pilipinas.
Bangud may 30-day notice nga ginhatag ang bise-presidente, mangin epektibo ang iya resignation sa Hulyo 29, 2024.
‘FRIENDLY GIHAPON’
Gin-athag man sini nga maayo gihapon ang ila personal nga relasyon ni President Ferdinand Marcos, Jr. apisar pa nga nag-resign siya bilang miyembro sang Gabinete.
Suno sa bise-presidente, wala sang nangin problema sang ginbaton sang presidente ang iya nga resignation letter kag maayo man ang pagtapos sang ila istorya sang nagkadto siya sa Malacañang.
“We are still friendly with each other on a personal level… Pumunta ako sa opisina ni Pangulong Marcos at sinabi ko sa kanya dala ko ‘yung resignation letter ko, and maayos naman ‘yung kaniyang pagtanggap and maayos din ‘yung pagtapos ng aming pag-uusap,” suno kay Sara.
Matandaan nga sang naglupok ang balita nga nag-resign si Sara, ginpahayag sang iban nga “open war” na ini sa tunga sang mga Duterte kag Marcos; may nagasiling nga preparasyon na ini para sa 2028 elections kag agaway sang gahum; may nagpahayag nga pormal na nga nabungkag ang UniTeam; kag may nagdeklarar man nga si Sara na ang lider sang oposisyon.#
Photo: Reuters: Lean Daval Jr
