𝗢𝗧𝗢𝗡, 𝗜𝗟𝗢𝗜𝗟𝗢 — Patay ang isa ka lalaki matapos nga nalumos sang ini ang naglangoy sa baybayon sang Brgy. Cabanbanan, Oton, Iloilo.
Ang biktima amo si Jerry Genizira, legal ang pang-edaron, kag residente sang Brgy. Buray, Oton, Iloilo.
Sa interview sang Bombo Radyo kay Adonis Labordo, pakaisa sang biktima, iya ginpahayag nga upod sila naglangoy sang biktima kag kaupod man ang bayaw kag hinablos sini.
Suno kay Labordo, ginkakibot lamang nila nga yara na sa tunga nga parte sang baybayon ang biktima kag ulihi nakit-an nga nagapamaypay sang iya nga kamot agud nga magpangayo sang bulig.
Sang natalupangdan sang hinablos sang biktima nga nagasarurot na ang lawas ni Jerry, gilayon nila nga ginlangoy agud tabangan, apang suno sa hinablos, masapnot kag indi sini masarangan nga mapaibabaw ang lawas sang biktima.
Ginpahayag man sang natungdan nga ginbuhat niya tanan niya nga masarangan agud nga masustener nga mauyatan ang kamot sang biktima, apang, bangud sa tuman na ka damo nga nainom sini nga tubig, gibuy-an niya lamang ini.
Nangin dako naman nga pagpanghangkat kay Labordo nga luwason ang biktima bangud sa pa-hunas ang baybayon, sa diin, mas mabaskog ang pressure sa idalom sang tubig.
Nahibaluan nga santo sa imbestigasyon sang otoridad, naglawig sang tatlo ka oras antes nga nakita ang lawas sang biktima.
