ILOILO CITY- Nagapakig-angot na ang National Telecommunications Commission sa mga social media platforms may kaangtanan sa lapnagon nga kaso sang pagpang-scam gamit ang online messaging.
Sa interview sang Bombo Radyo kay Atty. Deo Virgil Tan, legal officer sang National Telecommunications Commission Region 6, iya ginpahayag nga kaupod sang National Telecommunications Commission ang iban nga ahensya sang gobyerno agud mahatagan sang nagakaigo nga tikang agud matapna ang scams.
Suno kay Tan, una nila nga ginpakig-angotan ang Meta ukon mas kilala nga facebook kag ang Viber nga amo ang platforms kun sa diin ginapaagi ang scamming.
Nagpanugyan naman ini sa publiko nga mangin mabusisi kag indi magdali-dali nga magpati sa mga mabaton nga mensahe kag mangita sang paagi agud mag-verify sang impormasyon.
