𝗜𝗟𝗢𝗜𝗟𝗢 — Nagapati si Iloilo Governor Arthur Defensor, Jr. nga may yara sang magakontra sa iya sa posisyon nga pagka-gobernador sa 2025 elections.
Sa interview sang Bombo Radyo kay Defensor, iya ginpahayag nga apisar nga nagpasalig na ang pamilya Garin nga wala sang may tuyo nga magbunggo sa iya, nagapati ini sa gihapon nga may yara gid sang magkontra sa iya.
Suno kay Defensor, malawig pa ang mga tinion antes ang eleksyon kag madamo sang posible nga matabo ilabi na nga nagahilapit ang filing sang certificate of candidacy.
Ginpahayag man sini nga handa siya sa kun sin-o man ang mangin kasumpong niya.
Sa subong, wala paman sang may nakita ang iya nga partido sang posible mangin ka-tandem si Defensor bilang mangin bise-gobernador sini.
Una na nga ginpahayag ni Iloilo First District Representative Janette Garin nga ginaduso sini si former Oton Mayor Carina Flores, apang sang ulihi, nag-atras si Flores.
Mainit naman nga nagaguwa ang pangalan ni Iloilo 4th District Board Member Dominggo Oso, Jr. bilang posible mangin Vice Governor ni Defensor sa palaabuton nga eleksyon.
