𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 — Patay ang isa ka menor-de-edad, samtang isa ang pilason matapos nga nakabunggo ang motorsiklo nga ginasakyan sa isa ka poste sa Brgy. Guiso, Calinog, Iloilo.
Ang napatay amo ang nagamaneho sang motorsiklo, naga-edad sang 17-anyos, kag residente sang Brgy. Man-it, Passi, City.
Samtang ang angkas sini ang naga-edad 21-anyos, residente sang Brgy. Libot, Calinog, Iloilo, kag lunsay mga babaye.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga madasig ang pagpadalagan sang menor-de-edad sang motorsiklo rason nga naglapaw ini sa kurbadahon nga parte sang karsada kag nakabunggo sa poste.
Suno kay Dieron, wala sang ano man nga salakyan ang nasumalang sang mga biktima kag padulong kuntani ang duha sa banwa sang Passi.
Ginpahayag man sini nga bangud sa tuman ka baskog nga impact sang motorsiklo sa poste, nabali gid ang tiil sang naga-angkas nga biktima, samtang wasak naman ang motorsiklo.
Padayon naman nga ginabulong ang angkas nga nabalian sang tiil agud nga makuhaan sang statement kag matumod kun sin-o ang nagapanag-iya sa ila sang motorsiklo.
