Nagpanawagan ang grupo sang mga retirado nga opisyal sang Armed Forces of the Philippines (AFP) sa national maritime council nga tion na agud ihatag sa principal government agencies ang pagsolbar sa tensyon sa West Philippine Sea.
Sa interview sang Bombo Radyo kay retired Vice Admiral Emilio Marayag Jr., presidente kag board chairman sang Association of Generals and Flag Officers, Inc., iya ginpahayag nga madamo pa sang dapat tun-an ang national maritime council nga ginapamunuan ni Executive Secretary Lucas Bersamin.
Suno kay Marayag, nagakadapat nga itugyan na lang sang Executive Secretary ang pagsolbar sang tensyon sa West Philippine Sea sa Armed Forces of the Philippines kag Philippine Coast Guard.
Ginpahayag sini nga sulit-sulit ang pagpalya sang gobyerno nga protektahan ang West Philippine Sea sa China.
Nagapakita laman ini suno kay Marayag nga wala sang konkreto nga plano ang gobyerno agud ibalik ang full sovereign control sa lugar kaupod na ang tanan nga maritime resources sini.
Nagakadapat man suno sa natungdan nga nakabase sa independent foreign policy ang tanan nga tikang sang gobyerno agud mabalik ang kontrol sa territorial waters sang pungsod.
