ILOILO CITY- Ginalantaw sang otoridad ang posibilidad nga road rage ang kabangdanan sang natabo nga pagluthang-patay sa driver sang motorsiklo sa Talibong Pequiña, Mina, Iloilo.
Ang biktima amo si Patrick Superio , 47, kag anay security guard.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga base sa naggwa sa imbestigasyon, nagbungguanay ang isa ka pribado nga salakyan kag ang motorsiklo kag sang natumba ini, gintiro sang makatatlo ka beses ang biktima sa iya ulo.
Suno kay Araño, narekober sa lugar nga ginluntaran sang krimen ang tatlo ka basiyo sang bala sang ginapatihan 45 caliber pistol.
Narekober man ang bumper sang salakyan nga involved sa insidente.
Nagapadayon naman ang pag-review sang otoridad sang mga footages sa closed circuit television sa lugar nga mahimo makabulig sa imbestigasyon.
