ILOILO CITY- Ginpasangkad pa sang Department of Agriculture Region 6 ang ginapatuman nga animal border protocols kasunod sang pagpamahog nga dala sang Q fever sa kasapatan.
Kasunod ini sang pagkumpirma sang Bureau of Animal Industry nga may narekord na ang Pilipinas sang labing una nga kaso sang Q fever sa imported nga mga kanding halin sa Estados Unidos sang Amerika.
Apisar wala pa sang kaso sa rehiyon 6, nagapangaman ang ahensya paagi sa hugot nga koordinasyon sa local government units (LGUs) kag sa mga personnel sang Bureau of Animal Industry para maprotektahan ang lokal nga industriya sa pagsagod sang kasapatan.
Ang Q fever isa ka balatian nga dala sang Coxiella burnetii bacteria nga masami nagaapekto sa mga kanding, baka kag karnero.
Mahimo ini maglaton sa tawo paagi sa contact sa infected nga sapat ukon exposure sa ila body fluids.
Kun may impeksyon sa tawo, ang Q fever mahimo nga magtuga sang hilanat kag komplikasyon sa atay kag corazon kun mapabay-an.
