Ginalantaw sang National Grid Corporation of the Philippines (NGCP) nga wala na sang grid situation alerts nga ipasaka sa nabilin nga mga binulan subong nga tuig bangud naganubo na ang demand sa tag-ululan.
Suno kay NGCP spokesperson Cynthia Alabanza, bastante na ang kuryente sa transmission system kun rainy season bangud nga indi na mataas ang konsumo sang mga tawo indi kaangay sa summer.
Nahibaluan nga ginapasaka sang NGCP ang yellow alerts kun mas manubo ang operating margin sa kinahanglanon nga lebel agud malab-ot ang contingency requirement sang transmission grid.
Sa red alert naman, ginapatimaan sini nga insufficient ang power supply nga malab-ot ang consumer demand kag ang regulatory requirements sang transmission grid. Sa kada may red alerts, naga-implementar ang grid operator sang manual load dropping ukon rotational brownouts agud mamentenar ang integrity sang power grid.
Sang Abril tubtub Hunyo subong nga tuig, bangud sa tuman nga init, naglab-ot sa 11 ka red alerts kag 31 yellow alerts ang na-isyu sang NGCP sa Luzon grid.
Sa Visayas, may walo ka red alerts kag 26 yellow alerts samtang may duha naman ka yellow alerts sa Mindanao grid.
