𝗜𝗟𝗢𝗜𝗟𝗢 𝗖𝗜𝗧𝗬 — Nagpanindugan ang Committee on Engineering, Construction, and Public Works sang Iloilo City Council nga kinahanglan sa gihapon sang Department of Public Works and Highways (DPWH) nga magpasa sang requirements nga kinahanglanon agud nga mapadayon ang pagpatukod sang sea wall sa Brgy. Rizal Pala-Pala 1, 2, kag Tanza Bonifacio, Iloilo City.
Sa interview sang Bombo Radyo kay Iloilo City Councilor Johnny Young, Chairman sang Committee on Engineering, Construction, and Public Works, iya ginpahayag nga apisar nga nagpangayo ang Department of Public Works and Highways sang pulo ka adlaw agud nga padayunon ang paghuman sang sea wall, kinahanglan sa gihapon nila nga magpasa sang kulang nga mga dokumento.
Suno kay Young, kinahanglan man anay nga pangayo-an sang kontraktor kag sang nasambit nga ahensya sang certificate nga nagapamatuod nga indi paghimuon nga esplanade ang proyekto nga sea wall.
Ginpahayag man sini nga dapat man nga magpasa sang dokumento nga naghalin sa Philippine Reclamation Authority (PRA) agud pamatud-an nga wala sang reklamasyon nga matabo.
Kinahanglan man suno sa natungdan nga magpasa sang requirements nga ginapangayo halin sa Department of Environment and Natural Resources (DENR) kag Bureau of Fisheries and Aquatic Resources (BFAR).
Nahibaluan nga una na nga gin-claim ni Engineer Sanny Boy Oropel, Regional Director sang DPWH Region 6 nga wala sang reklamasyon nga matabo sa paghuman sang sea wall.
Ang nasambit nga sea wall ang gindagdagan ni Iloilo City Mayor Jerry Treñas sang cease and desist agud pauntaton ang pagpatukod sang proyekto bangud sa kakulangan sang mga requirements.
