𝗜𝗟𝗢𝗜𝗟𝗢 — Nagakabalaka ang Iloilo Provincial Health Office (IPHO) sa pagtimbuok sang kaso sang dengue probinsya sang Iloilo subong nga bulan sang Hunyo.
Sa interview sang Bombo Radyo kay Dr. Maria Socorro Quiñon, Head sang Iloilo Provincial Health Office, iya ginpahayag nga gilayon nga magpakonsulta kun nagabatyag sang mga sintomas sang dengue kaangay na lamang sang hilanat kag pagsuluka.
Suno kay Quiñon, nakarecord ang Department of Health Region 6 sa Iloilo sang 115 dengue cases sa isa lamang ka semana sugod sang Hunyo 16 tubtob Hunyo 25, 2024.
Ginpahayag man sini nga halin Enero tubtob Hunyo subong nga tuig, may yara na sang 1,294 cases ang na-record nga kaso, sa diin, mas mataas kun ikumpara sa kapin 700 nga kaso sang tinalikdan nga tuig sa kapareho nga time period.
Nagpanawagan man ang natungdan nga i-mobilize ang komunidad ilabi na ang mga opisyal sang barangay agud nga magpatuman sang pagpanglimpyo sa mga ugsaran agud nga matapna ang pagsaka sang kaso sang dengue.
