𝗔𝗟𝗜𝗠𝗢𝗗𝗜𝗔𝗡, 𝗜𝗟𝗢𝗜𝗟𝗢 —Nagpabutyag sang kaakig si AlimodianVice Mayor Gefree “Kalay” Alonsabe batok sa Iloilo Electric Cooperative, Inc. 1 ukon ILECO Uno matapos ang sunod-sunod nga pagluntad sang brownout sa Alimodian, Iloilo.
Sa interview sang Bombo Radyo kay Vice Mayor Alonsabe, iya ginpahayag nga kun indi gilayon masolusyunan sang kooperatiba ang problema sang ila nga serbisyo, magalunsad ini sang signature campaign agud mapalab-ot ang palpak nga serbisyo sang ILECO Uno kay President Ferdinand “Bongbong” Marcos, Jr.
Suno kay Alonsabe, daw kaangay nga wala sa lugar ang masami nga brownout bangud apisar nga wala sang bagyo ukon tuman ka init nga tyempo, patay-sindi sa gihapon ang kuryente.
Ginpahayag man sini nga masami ginarason sang ILECO Uno amo ang may toko, pispis, kag burador nga nagakalasab-it sa ila linya, rason nga ginatunaan sang gulpiyada nga brownout.
Isa man sa ginarason sang kooperatiba, amo ang ila nga transfomers bangud masami nga naga-trip off, sa diin, nagsuhestyon ang vice mayor nga kun daan, dapat nga ginaislan na.
Ginpaathag man sang natungdan nga ang iya nga sentyemento, amo ang bilang isa ka konsumidor kag indi isa ka bise-alkalde sang banwa sang Alimodian.
Samtang, sa ginpatigayon nga pagsinapol sang nagligad nga semana paagi sa committee hearing kaupod ang opisyales sang banwa kag ang manager sang kooperatiba, nagpasalig ang ILECO Uno nga pasangkaron ang ila nga serbisyo.
Apang, sa liwat nga pagluntad sang brownout, ginkadismaya ini liwat ni Vice Mayor Alonsabe.
Nahibaluan nga alas-tres kagina sang kaagahon sang ulihi nga nag-brownout sa lugar nga nangin rason agud mag-post si Alonsabe sa social media sang iya nga kaakig.
Ginalantaw man ni Alonsabe nga ilakip sa reklamo ang P14 kilowatts per hour nga presyo sang kuryente sang kooperatiba nga mas mataas kun ipaanggid sa iban nga electric cooperatives.
