𝗜𝗟𝗢𝗜𝗟𝗢 𝗖𝗜𝗧𝗬 — Naglab-ot sa 48 ka mga pamilya kag 13 ka mga panimalay ang naapektohan sang nagluntad nga sunog sa Brgy. Ma. Cristina, Jaro, Iloilo City.
Sa interview sang Bombo Radyo kay Jorge Jesus Bellosillo, Social Welfare Officer I, iya ginpahayag nga yara na subong ang lima ka mga pamilya kag 28 ka mga indibidwal sa evacuation center kag nakabaton na sang mga pagkaon halin sa pribado nga mga agencies.
Suno kay Bellosillo, 11 ka mga panimalay ang totally damaged nga ginalakipan sang 19 ka pamilya kag 27 ka mga renters; samtang duha diri ka panimalay ang partially damaged nga ginalakipan sang duha ka mga pamilya.
Ginpahayag man sini nga nagtanyag sang bulig ang Red Cross Philippines, opisina nanday Iloilo City Mayor Jerry Treñas, kag Iloilo City Lone District Representative Julienne “Jam-jam” Baronda sa mga nasunogan.
Nakabaton man ang mga biktima sang non-food items kag padayon pa tubtob subong nga nagasulod ang mga bulig halin sa nagkalain-lain nga organisasyon.
Santo naman sa pinakaulihi nga imbestigasyon sang otoridad, wala sang may na-record nga casualty ukon napatay sa nagluntad nga sunog.
Padayon naman nga ginaimbestigaran sang Bureau of Fire Protection (BFP) ang nagluntad nga sunog agud nga matumod ang balor sang kahalitan sini.
