ILOILO CITY- Wala na makilal-an sang otoridad ang duha ka grupo sang mga pamatan-on nga naglinagsanay kag linampusanay sang baratiha sa Diversion Road nga sakop sang San Rafael, Mandurriao, Iloilo City.
Sa interview sang Bombo Radyo kay Police Captain Val Cambel, hepe sang Mandurriao Police Station, iya ginpahayag nga sang ginkadtuan sang patrol sang pulis ang area, nagtal-as naman sa pagpalagyo ang mga pamatan-on.
Suno kay Cambel, naggwa sa imbestigasyon nga mga pumuluyo sang La Paz kag posible nga taga-Nabitasan ang nasambit nga mga pamatan-on.
May kaangtanan sa natabo, ginpahayag sang hepe nga padayon sa gihapon ang ila pagbantay sa palibot sang distrito agud nga madasig nila nga marespondehan ang kaangay nga mga insidente.
