𝗠𝗜𝗡𝗔, 𝗜𝗟𝗢𝗜𝗟𝗢 — Patay ang isa sa duha ka mga subject kasunod sang ginpatigayon nga drug buy-bust operation sang Regional Police Drug Enforcement Unit 6 (RPDEU) sa Brgy. Badiangan, Mina, Iloilo.
Ang napatay nga subject amo sanday Alnie Talamor, 41-anyos, tumandok sang Brgy. Janipaan Central, Cabatuan, Iloilo.
Samtang ang isa ka subject amo si Jeory Leso, 48-anyos, residente sang Brgy. Badiangan, Mina, Iloilo.
Sa interview sang Bombo Radyo kay Police Captain Glenn Soliman, Team Leader sang Regional Police Drug Enforcement Unit (RPDEU), iya ginpahayag nga nakuha sa mga subject ang 700 grams nga suspected shabu kag nagabalor sang P4.9 million.
Suno kay Soliman, ginkakibot nila nga direkta ang mga subject nga nagpadulong sa banwa sang Mina bangud santo sa una nila nga impormasyon, magapatuman sang transakyon ang duha sa banwa sang Pototan.
Ginpahayag man sini nga nauna sa area si Leso, dala ang iya nga salakyan, sa diin, ginhulat pa sini nga mag-abot si Talamor.
Nagpadulong naman sa lugar si Talamor sakay sa iya nga sniper nga motorsiklo agud nga magkuha kuntani sang iligal nga druga.
Gamit naman ang P50,000 nga buy-bust money, nagpatuman sang transakyon ang poseur buyer sa mga subject.
Dugang ni Soliman nga sang nagpakilala na ang pulis nga isa ka police poseur buyer, idto kag nagtuyo si Talamor nga maggabot sang iya nga armas nga caliber .45, apang, gilayon naman nga gintiro sang pulis ang suspek kag naigo sa lawas, rason nga natumba ini sa talamnan.
Ginhingagaw pa dala sa Pototan Provincial Hospital si Talamor agud malapatan sang pagbulong, apang gindeklara nga dead on arrival (DOA).
Nahibaluan nga si Talamor ang nagaserbi bilang bodegero sang druga sa probinsya kag may anay nga kaso robbery, paggamit sang indi lisensyado nga armas, kag murder.
Preso naman ang kaupod sini nga si Leso kag nagapangutang sa kaso nga Republic Act 9165 ukon Comprehensive Dangerous Drugs Act of 2022.
